Kuni kecha chernogoriyalik himoyachi Luka Uskokovich “Andijon” a’zosi siftaida tanishtirildi. Tajribali himoyachi jamoaning Antaliyadagi yig‘inidagi ishtirokini allaqachon boshlagan.
Uskokovich klub matbuot xizmatiga ilk intervyusini berdi va iliq fikrlarni bildirdib o‘tdi.
— Luka, «Andijon» klubiga xush kelibsiz! Qaroringizdan mamnun ekaningiz ko‘rinib turibdi…
— Yaxshi kutib olganinglar uchun rahmat. Juda xursandman va bu yerda bo‘lishdan mamnunman.
— Kelishingizdan avval klub va shahar haqida ma’lumotlar to‘plagandirsiz-a?
— Men juda ko‘p ma’lumotlar yig‘dim. Klub va shahar haqida yaxshi fikrlar eshitdim.
— O‘zbekiston chempionatini qanchalik bilasiz?
— O‘zbekiston chempionati haqida asosan pozitiv fikrlarni aytishdi. Bu men uchun yangi chaqiruv va yangi sinov. O‘zbekiston chempionatidagi sarguzashtlarim boshlanishini intizorlik bilan kutyapman.
— Sizdan oldin hamyurtingiz Miomir Jurichkovich ham «Andijon» a’zosiga aylangan. Uni yaxshi bilsangiz kerak-a?
— Miomirni yaxshi bilaman, u juda ajoyib futbolchi. Umuman olganda, u yaxshi yigit. U bilan yaxshi chiqib keta olishimizga va jamoada barqaror o‘ynay olishimizga ishonaman. Biz tandem sifatida ham muvaffaqiyatli harakat qila olamiz, deb umid qilaman.
— Siz Sloveniyada 3 marta mamlakat chempionligini qo‘lga kiritgansiz. Bunday lahzalar har bir futbolchi uchun yoqimli va O‘zbekistonda ham shunday bo‘lishiga umid qilayotgandirsiz?
— Ha, futbolchi uchun titullar doim muhim va bu hamisha yoqimli. Har doim Kuboklarni qo‘lga kiritilishini xohlaydi. Bu klub uchun ham, individual tomondan ham juda yaxshi, muhim sanaladi. Ishonamanki, ajoyib natijalarga erisha olamiz. Aynan mana shu maqsadda men ushbu jamoaga keldim. Uning maqsadlarini ro‘yobga chiqarishda o‘z hissamni qo‘shmoqchiman. Men qo‘yadigan vazifalar orasida eng oliysi, albatta titullarni qo‘lga kiritish hisoblanadi.
— Jamoamizning muxlislariga qanday gapingiz bor?
— Bizning muxlislarimizga va’da berishim mumkin bo‘lgan yagona narsa shuki, individual va jamoa tarafidan imkoniyatimizda bor bo‘lgan barcha narsani beramiz. Qo‘limizdan kelganicha kurashamiz. Ishqibozlarni xursand qilish uchun g‘alabalarimiz, yaxshi o‘yinlarmiz va sovrinlar bilan quvontiramiz. Ishonamanki, oldimizda kutib turgan mavsum muvaffaqiyatli kechadi.