1 fevral kuni Superliganing yangi mavsumiga qur’a tashlash marosimi bo‘lib o‘tgandi. 4 fevral kuni esa «Paxtakor» Elit Chempionlar ligasi doirasida maydonga tushdi.
Liga mavsum 7 mart kuni start olishini o‘tgan yilning oktyabr oyida ma’lum qilgandi. Dastlabki ikki tur sanalarining to‘liq aniq bo‘lishi masalasi «Paxtakor» klubining xalqaro maydondagi natijasiga, shuningdek, O‘zbekiston milliy terma jamoasining mart oyidagi yig‘iniga bog‘liq bo‘lib turgandi. Boisi, «Paxtakor» Chempionlar ligasining 1/16 final bosqichiga yo‘l olsa, mart oyining dastlabki ikki haftasida 2 ta xalqaro o‘yinida ishtirok etishi lozim. Shuningdek, O‘FA Ligaga aloqaga chiqib, 2-turdan o‘rin olgan ayrim uchrashuvlarni FIFA kuniga taqamaslikni so‘radi.
Liga sana belgilayotganda «Paxtakor»ning ehtimoliy navbatdagi bosqichga yo‘llanma olishidan kelib chiqib, mavsumni aynan shu klub ishtirokidagi o‘yin bilan boshlashga qaror qildi. Shuningdek, klubning 2-turdagi raqibi OKMK ishtirokidagi bellashuv ham 7 mart sanasiga to‘g‘ri keldi. O‘z-o‘zidan qolgan 6 bellashuv dam olish kunlariga taqsimlandi.
Shuningdek, 2-tur o‘yinlarini belgilashda O‘FA taklifidan ham kelib chiqildi. Mart oyi milliy terma jamoaning kelgusi taqdirida muhim palla hisoblanadi. Faqatgina OKMK — «Paxtakor» uchrashuvi sanasida to‘liq qaror qabul qilishning imkoni bo‘lmadi. «Paxtakor» Chempionlar ligasida navbatdagi bosqichga yo‘llanma olsa, u Superliganing 2-turini 16 mart kuni o‘tkazadi. Agar klub “As-Sadd” bilan o‘yinda o‘zi uchun kerakli natijaga erisha olmasa, mazkur to‘qnashuv 14 mart kuni bo‘lib o‘tadi.
Liga mart oyidagi FIFA kunlaridan keyingi taqvimni ham ishlab chiqmoqda. Bunda CAFA o‘tkazishi mumkin bo‘lgan klublar o‘rtasidagi musobaqa ham inobatga olinishi lozim. Biroq ayrim masalalar to‘liq hal etilmaganidan kelib chiqib, mazkur musobaqa sanalarida ham yakuniy to‘xtamga kelinmagan. Ishonamizki, jamoatchilik Liga qarshisida turgan vaziyatni to‘g‘ri talqin qiladi.
