Italiyaning «Napoli» klubi yozgi transfer oynasida sakkiz nafar yangi futbolchi xarid qilishni rejalashtirmoqda. Bu haqda jurnalist Nikolo Skira ijtimoiy tarmoq X (ilgari Twitter) orqali xabar berdi.
Manbaga ko‘ra, klub rahbariyati yangi darvozabon, qanot himoyachisi, ikki markaziy himoyachi, markaziy yarim himoyachi, bir yoki ikki vinger (PSJga ketgan Xvicha Kvarasheliyaning o‘rnini bosish uchun), shuningdek, Romelu Lukakuga zaxira sifatida hujumchi sotib olishni rejalashtirmoqda.
Hozirgi vaqtda Italiya chempionati turnir jadvalida «Inter» 64 ochko bilan peshqadamlik qilmoqda. Ikkinchi o‘rinda 61 ochko bilan «Napoli» joylashgan. «Atalanta» esa 58 ochko to‘plab, kuchli uchlikni yakunlab turibdi. Top-5ga shuningdek, «Bolonya» (53 ochko) va «Yuventus» (52 ochko) kirgan.