Ispaniyaning “Real Sosyedad” klubi bosh murabbiyi Imanol Alguasil o‘ziga yangi ish variantlarini izlashda davom etmoqda. Bu haqda A Bola xabar bermoqda.
Manbaga ko‘ra, Alguasil Portugaliya chempionatiga ko‘chib o‘tishi mumkin. “Portu” vakillari allaqachon mutaxassis bilan muloqot qilib, ko‘plab masalalar, jumladan, moliyaviy masalalar bo‘yicha ham o‘zaro tushunish hosil qilishgan.
San-Sebastyan jamoasi bilan qariyb 7 yil ishlagan mutaxassis yozda o‘z ixtiyori bilan klubni tark etadi. Kuni kecha Alguasil “Bayer” bosh murabbiyligiga nomzodlardan biri sifatida ko‘rilayotgandi, endi esa uning qo‘lida yana bir variant paydo bo‘ldi.
Ayni paytda “Portu” chempionatda to‘rtinchi o‘rinni egallab turibdi, bu jamoaning 1976 yildan beri eng yomon ko‘rsatkichidir.