Chempionlar Ligasi yarim finali javob uchrashuvida “Inter” va “Barselona” o‘rtasidagi bahsda, birinchi taym oxirida Xakan Chalxano‘g‘li penaltidan gol urdi. Polshalik bosh hakam Shimon Marchinyak avval to‘pga o‘yin deb hisoblagan, ammo VAR maslahati orqali epizodni qayta ko‘rib chiqib, 11 metrlik jarima zarbasini tayinladi.
Mashhur murabbiy Arsen Venger esa ushbu qaror bilan keskin norozi ekanini bildirdi.
“Men bunaqa penaltilarga mutlaqo qarshi bo‘lganman va shunday bo‘lib qolaman. Qayta ko‘rish uchun sekinlashtirilgan videolavhalardan foydalanishga ham qarshiman. Bu epizodni odatiy tezlikda ko‘rsak, Kubarsi ajoyib “podkat” tashlaganini ko‘ramiz. U birinchi bo‘lib to‘pga yetgan — men uchun eng muhim jihat shu. Kontakt bor-yo‘qligi muhim emas”, — dedi Venger Bein Sport efirida.