O‘zbekiston U-15 terma jamoasi “Rivojlanish kubogi” doirasidagi navbatdagi uchrashuvda Latviya ustidan irodali g‘alabaga erishdi. Uchrashuv dramatik tarzda rivojlandi va yigitlarimiz bir kishiga kam bo‘lib o‘ynagan holda to‘liq burilishga erishishdi.
Bellashuvning 28-daqiqasida Yahyobek Nasrulloyev ikkinchi sariq kartochkani olib, maydondan chetlatildi. Bu vaziyatdan so‘ng raqib tashabbusni o‘z qo‘liga oldi va 40-daqiqada Davids Kurakins orqali hisobni ochdi. Birinchi bo‘limda boshqa gol qayd etilmadi.
Ikkinchi taymni terma jamoamiz bir qator almashinuvlar bilan boshladi va bu o‘zgarishlar o‘z samarasini tez orada berdi. 49-daqiqada Abubakr Mamatov hisobni tenglashtirdi. O‘yin so‘ngida yana bir necha strategik o‘zgarishlar amalga oshirildi.
85-daqiqada Hajiakbar Zulfiqorov penaltidan aniq zarba berib, jamoamizni hisobda oldinga olib chiqdi. Qo‘shilgan daqiqalarda esa Ro‘zimurod Ro‘zimurodov o‘yinning taqdirini mustahkamlab qo‘ydi — 90+4 daqiqada u jamoamizning uchinchi golini kiritdi.
U-15 “Rivojlanish kubogi”
Latviya – O‘zbekiston – 1:3
Gollar: Davids Kurakins (40′) — Abubakr Mamatov (49′), Hojiakbar Zulfiqorov (85′, penalti), Ro‘zimurod Ro‘zimurodov (90+4′)
Chetlatish: Yahyobek Nasrulloyev (28)