Fransiyaning “PSJ” klubi UEFA Chempionlar Ligasi finalida erishgan yirik gʻalabasi evaziga 25 million yevro mukofot puli qoʻlga kiritdi. Parijliklar turnirdagi umumiy ishtiroki uchun esa jami 146 million yevro daromad oldi.
Turnir davomida klublar oʻz natijalariga qarab UEFA tomonidan belgilangan mukofot pullarini qoʻlga kiritishdi. Mukofotlar quyidagicha taqsimlangan:
* guruh bosqichidagi har bir gʻalaba uchun — 2,1 million yevro
* har bir durang uchun — 700 ming yevro
* 1/8 finalga chiqish — 12,5 million yevro
* Chorak finali – 15 million yevro
* Yarim Final – 18,5 million evro
* finaldagi gʻalaba — 25 million yevro
Bundan tashqari, klublar UEFA tomonidan ajratiladigan marketing daromadlari va translyatsiya huquqlaridan ham foyda koʻradi.
Finalda “PSJ”ga 5:0 hisobida yirik magʻlubiyatga uchragan “Inter” esa turnirdagi ishtiroki uchun jami 136,6 million yevro ishlab topdi. Ushbu summaga finalga chiqqani uchun olingan 15 million yevro va oldingi bosqichlardagi barcha mukofot pullari kiradi.
“Arsenal” YECHL ortidan eng koʻp daromad qilgan 3-jamoaga aylandi. Londonliklar turnirdagi ishtiroki evaziga 117 million yevro qoʻlga kiritgan.
Shuningdek, “PSJ” UEFA Superkubogi doirasida Londonda boʻlib oʻtadigan bahsda ishtirok etadi va bu oʻyin uchun yana 4 million yevro mukofot puli oladi.
Eslatib oʻtamiz, Chempionlar Ligasi finali kecha, 31 may kuni Myunxen shahridagi “Allianz Arena” stadionida boʻlib oʻtdi. Unda “PSJ” “Inter”ni 5:0 hisobida magʻlub etdi. Bu Parij klubi tarixidagi ilk Chempionlar Ligasi kubogi hisoblanadi.