“Brayton” hujumchisi Evan Fergyuson Italiyaning “Roma” klubiga o‘tadi.
Rimliklar “chaykalar” bilan irlandiyalikning ijara shartlari bo‘yicha yakuniy kelishuvga yaqin turibdi, deb xabar berdi insayder Fabrisio Romano. “Bo‘rilar” 20 yoshli futbolchining Italiyadagi faoliyati davomida oladigan maoshini to‘liq qoplab beradi. Tomonlar so‘nggi nyuanslarni hal qilishlari kerak.
Evan Fergyuson 2024/25 yilgi mavsumning ikkinchi yarmini “Vest Xem”da ijarada o‘tkazdi, ammo muvaffaqiyatga erisha olmadi, sakkizta o‘yinda maydonga tushdi va birorta gol ura olmadi. Hujumchining “Brayton” bilan amaldagi shartnomasi 2029 yilning yarmigacha mo‘ljallangan.