1 avgust kuni Malayziyaning Kuching shahrida bo‘lib o‘tgan para taekvondo bo‘yicha Osiyo chempionatida muvaffaqiyatli qatnashib, umumjamoa hisobida birinchi o‘rinni egallagan O‘zbekiston terma jamoasi a’zolari tantanali kutib olindi.
Matonatli sportchilarimizni Toshkent xalqaro aeroportida O‘zbekiston Milliy Paralimpiya qo‘mitasi rahbariyati, ommaviy axborot vositalari vakillari va oila a’zolari qarshi oldi.
Eslatib o‘tamiz, paralimpiya o‘yinlari uchun muhim reyting ochkolarini ulashuvchi ushbu Osiyo chempionatida yurtdoshlarimiz 3 ta oltin, 4 ta kumush va 3 ta bronza, jami 10 ta medalni qo‘lga kiritgan holda umumjamoa hisobida birinchi bo‘ldi va yana bir bor qit’amizning eng kuchli jamoalaridan ekanini isbotladi.