“Napoli” bosh murabbiyi Antonio Konte yarim himoyachi Kevin de Bryuyne haqida gapirdi. Belgiyalik yozda “Manchester Siti”dagi o‘n mavsumdan so‘ng neapolliklar tarkibiga borib qo‘shildi.
“De Bryuyne bu muhitga butunlay kirishib ketdi. U ishning qanchalik muhimligini juda yaxshi tushunadi, ortiqcha gapirmaydi. Bu shu yerda bo‘lgan o‘yinchilar uchun juda kerakli xarid edi. Kevin ajoyib karyera qilib, bu yerga kelgan. U bir soniya ham mashg‘ulotlarni o‘tkazib yubormaydi. U har doim qo‘lidan kelganini qilgan va hamma uchun ochiq bo‘lgan. Endi uch va to‘rt yarim himoyachi o‘rtasidagi muvozanatni to‘g‘ri topishga harakat qilamiz. Oldinda ko‘plab o‘yinlar bor. De Bryuyne – ajoyib yigit. U hammani hayratda qoldirdi,” – dedi Konte jurnalistlarga.
A Seriya 1-turida “Napoli” safarda “Sassuolo”ga qarshi bahs olib boradi. O‘yin 23 avgust, shanba kuni bo‘lib o‘tadi.