Ijtimoiy tarmoqlarda Toshkentdagi musiqa festivaliga tashrif buyurgan odamlar jamoat tartibini buzayotgani aks etgan video tarqalib, keng muhokamalarga sabab bo‘lmoqda. Toshkent shahar IIBB vaziyat yuzasidan rasmiy ma’lumot berdi.
– Joriy yilning 6 sentabr kuni Yunusobod tumanida musiqa festivalining birinchi kuni bo‘lib o‘tdi. Soat 18:00 dan 22:20 gacha bo'lib o'tgan tadbirga ko'plab musiqa ixlosmandlari yig'ildi. Biroq ular orasida jamoat tartibini buzayotgan, ijtimoiy xulq-atvor qoidalariga e’tibor bermay, mayda bezorilik qilayotgan fuqarolar ham uchrab turibdi.
Ichki ishlar organi xodimlari tomonidan ko‘rilgan chora-tadbirlar natijasida ularning shaxsi aniqlanib, 5 nafar voyaga yetmaganlarning ota-onalariga Ma’muriy javobgarlik to‘g‘risidagi kodeksning 47-moddasiga asosan ma’muriy bayonnoma rasmiylashtirildi. Qolgan fuqarolarga kelsak, to‘plangan hujjatlar asosida tergov harakatlari olib borilmoqda. Yakuniy qonuniy qaror qabul qilinishi taʼminlanadi”, — deyiladi xabarda.
Shuningdek, tergov davomida odamlardan jabrlanganlar bo‘lmagani ma’lum qilindi.