O‘zbekiston Respublikasi Prezidenti Shavkat Mirziyoyev mamlakatimizga rasmiy tashrif bilan kelgan Germaniya federal kansleri Olaf Sholsni Registon maydonida kutib oldi.
Ajdodlarimizning bunyodkorlik salohiyatini o‘zida mujassam etgan mamlakatimizning asosiy timsollaridan biri – dunyoga mashhur Registon maydoni YuNESKOning Butunjahon merosi ro‘yxatiga kiritildi. Majmua tarkibiga kiruvchi Mirzo Ulug‘bek, Sherdor va Tillakori madrasalari o‘zining qudrati, boy tarixi va betakror me’morchiligi bilan odamlarda katta taassurot qoldirmoqda.
Oliy martabali mehmonga Sharq meʼmorchiligining ushbu durdonasining qurilishi, yechimlari va bezaklarining oʻziga xos jihatlari, shuningdek, ushbu maskan, oʻzbek xalqining madaniy merosi bilan bogʻliq muhim voqea va siymolar haqida tarixiy maʼlumotlar berildi.
Suhbat chog‘ida jahon sivilizatsiyasining qadimiy beshiklaridan biri sifatida e’tirof etilgan Samarqand shahri bugun ishbilarmonlik va sayyohlik markaziga aylanib borayotgani ta’kidlandi.
Shavkat Mirziyoyev va Olaf Shols Registon spektakl maydoni oldida birga suratga tushdi.