Qayd etilishicha, uy qurishga va’da bergan quruvchilar va ularga pul tikib qo‘ygan aholi o‘rtasida kelishmovchiliklar kuchaymoqda. Bunday insofsiz quruvchilarga aldanib, odamlar uysiz, pulsiz qolishadi.
Shu bois Prezident topshirig‘iga ko‘ra, qurilish vaziri boshchiligidagi Ishchi guruh xorijiy tajribani o‘rgandi. Endi uy-joy sotib olish uchun kafolatlangan depozit tizimi joriy etiladi.
Bunda investor o‘zi qurayotgan uy-joylarni sotishni tashkil etish bo‘yicha shartnoma tuzadi, bu uylarni sotib olmoqchi bo‘lgan shaxsning puli qurayotgan shaxsga emas, to‘g‘ridan-to‘g‘ri bankka o‘tkaziladi.
Banklar esa quruvchiga tushumni resurs sifatida taqdim etadi. Shundan so‘ng bank quruvchi va xaridor o‘rtasida ko‘prik vazifasini o‘taydi, uy-joy qurilishining belgilangan muddatlarda, sifatli va egasiga topshirilishini ta’minlaydi.
Yangi tizim bir yil davomida Samarqand shahri, Yangihayot va Sergeli tumanlarida sinovdan o‘tkazilishi belgilandi.