Kelgusi olti yil ichida O‘zbekistonda “yashil” elektr stansiyalari quvvatini 20 gigavattdan oshirish rejalashtirilmoqda. Bu davrda mamlakatimizda 50 milliard kVt/soat elektr energiyasi ishlab chiqarish imkoniyati yaratilishi kutilmoqda. Buning natijasida har yili qariyb 15 milliard kub metr tabiiy gaz tejaladi. Bu haqda Toshkentda bo‘lib o‘tgan Xalqaro hamkorlik tashabbusi haftaligida Energetika vazirligi mutasaddilari ma’lum qildi.
Poytaxtimizda Xalqaro hamkorlik tashabbusi haftaligi doirasida “Yashil energetika sanoatini rivojlantirish istiqbollari” mavzusidagi muhokama sessiyasi bo‘lib o‘tdi. Davra suhbatida Energetika vazirligi mutasaddilari, xalqaro ekspertlar va xorijiy investorlar ishtirok etdi.
Anjumanda ishtirok etgan “Acwa Power” kompaniyasi vakili O‘zbekistonni bu boradagi markaz deb bilishini va bu davlat orqali qo‘shni davlatga kirib borish imkoniyati borligini ta’kidlab, hamkorlikda amalga oshirilayotgan ishlar haqida gapirdi:
“O‘zbekistonda 15 ta loyihani amalga oshirmoqdamiz. Bizning vazifamiz mamlakatingizga energiya almashinuvida oldinga siljishda yordam berishdir. Ma'lumotda aytib o'tilganidek, qayta tiklanadigan energiyadan tashqari, vodorod energiyasi va gidroenergetikani rivojlantirish ham yashil energiyaga o'tishda muhim ahamiyatga ega, shuning uchun biz hozirda yashil vodorod loyihasi ustida ishlamoqdamiz. Menimcha, bu O‘zbekistonning ekologik toza energiyaga o‘tishida katta qadam bo‘ladi”. – dedi Entoni Brinkxuyzen, Aswa Power kompaniyasining mintaqaviy qurilish menejeri.
O‘zbekistonda Markaziy Osiyodagi eng yirik shamol energetikasi loyihasini ishlab chiqayotgan “Masdar” kompaniyasi vakili 2030 yilgacha energiya ishlab chiqarishni ko‘paytirish maqsadi aniq belgilab qo‘yilgani investorlarning ishonchini oshirayotganini ta’kidladi:
“Infratuzilma innovatsiyalariga sarmoya kiritishda yaxshi oʻzgarishlar bor. Ayni paytda qo‘shma hamkorlik orqali mamlakatingizda ishlab chiqarilayotgan energiya quvvatini ikki barobar oshirishni rejalashtirganmiz. Bunday muloqotlarni o‘tkazish hamkorlik aloqalarini mustahkamlashda muhim ahamiyat kasb etadi. – dedi Abdulla Zaed, “Masdar” kompaniyasining investitsiyalar va rivojlanish bo‘yicha direktori.
Energetika vazirligi maʼlumotlariga koʻra, soʻnggi 6 yil ichida Oʻzbekistonda issiqlik elektr stansiyalari, quyosh energiyasi va shamol energetikasini qurish boʻyicha xorijiy investorlar bilan umumiy qiymati 29 milliard 234 million dollar boʻlgan 50 ta shartnoma imzolangan. Bu orqali investorlar 50 ta zamonaviy elektr stansiyasini qurishni rejalashtirmoqda.
Ta’kidlash joizki, ayni paytda 7 ta hududda “yashil” energiya ishlab chiqaradigan umumiy quvvati 2,7 GVt bo‘lgan 9 ta quyosh elektr stansiyasi va 1 ta shamol elektr stansiyasi mavjud. 2030 yilgacha 120 ming kilometr elektr uzatish liniyalari, 105 transformator stansiyasi va 35 mingdan ortiq transformator qurish va rekonstruksiya qilish rejalashtirilgan.