Prezident Shavkat Mirziyoyev 27-noyabr kuni xorijiy sarmoyalarni jalb qilish holati va kelgusi yil rejalariga bag‘ishlangan yig‘ilish o‘tkazdi. Bu haqda davlat rahbari matbuot agentligi yozmoqda.
O‘tgan 10 oyda mamlakatimizga 26 milliard dollardan ortiq xorijiy sarmoya kiritildi. Bu raqam o‘tgan yilga nisbatan 1,7 barobar ko‘pdir. Buning qariyb 24 milliard dollari to‘g‘ridan-to‘g‘ri investitsiyalardir.
Kiritilgan sarmoyalar evaziga 6 ming 300 ta korxona tashkil etilib, ular tomonidan 30 trillion dollarlik qo‘shimcha qiymat yaratildi, eksport hajmi 305 million dollarga oshdi. Eng muhimi, buning natijasida 163 ming yuqori maoshli ish o‘rni yaratildi.
Noyabr-dekabr oylarida yana 8,6 milliard dollar sarmoya kiritilishi kutilmoqda.
– Tanqid ruhida o‘tgan yig‘ilishda har bir hududda, har bir sohada sarmoya jalb etish, loyihalarni amalga oshirish chuqur tahlil qilindi. 8 ta tuman va shaharda investitsiya indeksi past. Ayrim tarmoqlarda bu raqam o‘tgan yilga nisbatan kamaygan. Xalqaro moliya institutlari ishtirokidagi ayrim loyihalar sekinlashmoqda. Jumladan, 17 ta loyiha bo‘yicha hujjatlarni tayyorlash va tender o‘tkazish jarayoni kechiktirilgan. Yig‘ilishda mutasaddilar yil yakunida kutilayotgan natijalar va 2025-yilga mo‘ljallangan rejalar haqida ma’lumot berdi”, — deyiladi xabarda.
Prezidentimiz hududlarning investisiyaviy faoliyatini yanada kuchaytirish, bu boradagi yondashuvni tubdan o‘zgartirish zarurligini ta’kidladi. Masalan, Yevropa taraqqiyot va tiklanish banki mamlakatimizdagi ishbilarmonlik muhitidagi ijobiy o‘zgarishlar va iqtisodiyotimizning o‘sish sur’atlarini hisobga olgan holda, xususiy sektor ishtirokidagi loyihalarni moliyalashtirishga tayyorligini bildirdi.
Hududlar bu imkoniyatlardan unumli foydalanishi va mustaqil kapital manbalarini jalb qilishi kerak. Shu bilan birga, investitsiyalar miqdorini oshirish bilan birga, sifatini ham oshirish zarur. Ya’ni, jalb qilingan har bir dollar sanoatni rivojlantirish, yangi ish o‘rinlari yaratish va eksport salohiyatini oshirishga xizmat qiladi.
Yig‘ilishda xalqaro va xorijiy moliya institutlari kapitalini jalb qilish hajmi va yo‘nalishlarini yana bir bor ko‘rib chiqish vazifasi qo‘yildi. 2025-yilga mo‘ljallangan loyihalarni tarmoqlar va hududlar kesimida, jumladan, davlat-xususiy sheriklik va xususiy investitsiyalarni aniq belgilash muhimligi ta’kidlandi.