Gruziya Yevropa integratsiyasi boʻyicha muzokaralardan bosh tortgach, AQSh ham strategik hamkorlikdan voz kechdi.
AQSh Davlat departamenti hukmron “Gruziya orzusi” partiyasining Yevropa integratsiyasi bo‘yicha muzokaralar olib borishdan bosh tortishi munosabati bilan AQSh hukumati Gruziya bilan strategik hamkorlikni to‘xtatayotganini ma’lum qildi.
“Gruziya orzusi” partiyasining Gruziyaning Yevroittifoqqa integratsiya jarayonini bloklash qarori gruzin xalqining Yevropa Ittifoqi va NATO integratsiyasiga intilish haqidagi konstitutsiyaviy va’dasiga ziddir. Gruziyaning Yevropa Ittifoqiga aʼzoligini toʻxtatib, “Gruziya orzusi” Yevropa bilan yaqinroq aloqalar oʻrnatish imkoniyatini inkor etdi va Gruziyani Kreml oldida yanada zaifroq qilib qoʻydi. “Gruziya orzusi” partiyasining turli antidemokratik harakatlari umumiy qadriyatlar va demokratiya, qonun ustuvorligi va fuqarolik jamiyati, inson huquqlari va asosiy erkinliklarga hurmatga asoslangan AQSh-Gruziya strategik sherikligining asosiy tamoyillarini buzdi. Natijada AQSh bu mexanizmni to‘xtatib qo‘ydi”, — deyiladi bayonotda.
Davlat departamenti, shuningdek, politsiyaning o‘z mansabdor shaxslarining harakatlariga norozilik bildirgan Gruziya fuqarolariga nisbatan “ortiqcha kuch ishlatganini” qoraladi. “Biz barcha tomonlarni namoyishlarning tinch xarakterini ta’minlashga chaqiramiz”, — deyiladi bayonotda.
Gruziyada bosh vazir Irakliy Kobaxidze 28-noyabr kuni mamlakat Yevropa Ittifoqiga qoʻshilish boʻyicha muzokaralarni 2028-yil oxirigacha toʻxtatishini maʼlum qildi. Shundan soʻng bu qarorga qarshi norozilik namoyishlari boshlandi.
Gruziya prezidenti Salome Zurabishvili namoyishchilarni qo‘llab-quvvatlamoqda. 30-noyabr kuni u mamlakatdagi “yagona huquqiy, mustaqil institut” bo‘lib qolishini va muddati tugashiga qaramay, o‘z lavozimini tark etmasligini ma’lum qildi. Gruziya Tashqi ishlar vazirligining yuzdan ortiq xodimi Yevropa integratsiyasining rad etilishiga norozilik bildirdi va bir qancha elchilar iste’foga chiqdi.
Gruziya Bosh vaziri Irakliy Kobaxidze namoyishlarni “mamlakat konstitutsiyaviy tizimiga hujum” deb atadi va ularni uyushtirganlikda yevropalik siyosatchilar va “beshinchi kolonna”ni aybladi.