Janubiy Koreya Milliy assambleyasi mamlakatda harbiy holat e’lon qilgan prezident Yun Seok Yolga impichment e’lon qilish uchun yetarlicha ovoz to‘play olmadi. Bu haqda Reuters agentligi xabar berdi.
Reglamentga ko‘ra, 300 delegatdan 200 nafari impichmentni yoqlab ovoz berishi kerak. Biroq hukmron “Xalq hokimiyati” partiyasining 108 delegatidan 105 nafari ovoz berishdan bosh tortdi va zalni tark etdi.
Muxolifatning aytishicha, prezidentni javobgarlikka tortish harakatlari to'xtamaydi.
Yig‘ilish davomida minglab namoyishchilar parlament oldiga to‘planib, prezidentga impichment e’lon qilinishi va uning hibsga olinishini talab qilishdi. BBC Rus kanaliga ko‘ra, olomon hukmron partiya delegatlarini g‘azabli hayqiriqlar bilan yig‘ilishdan tashqariga kuzatib qo‘ygan.
7 dekabr kuni Yun Sok Yeol televideniye orqali xalqqa murojaat qilib, harbiy holat joriy etish qarori uchun mamlakat xalqidan uzr so‘radi.
3-dekabr kuni kechqurun prezident Yun Seok Yol Koreyada 45 yil ichida birinchi marta “konstitutsiyaviy tuzumni kommunistik kuchlardan himoya qilish” uchun harbiy holat e’lon qildi.
Parlament a’zolari prezident qaroriga qarshi chiqdi va uni bekor qilish uchun ovoz berdi, shundan so‘ng prezident harbiy holatni bekor qildi.
4-dekabr kuni muxolifat partiyalari Milliy assambleyaga Yun Seok Yolga impichment e’lon qilish taklifini kiritdi. Prezidentga impichment e'lon qilish uchun parlament a'zolarining 2/3 qismi (jami 300 o'rin) ovoz berishi kerak.
Shuningdek, Janubiy Koreya politsiyasi Yun Seok Yolni davlatga xiyonatda gumon qilib, tergov boshlagani ma’lum bo‘ldi.