Toshkentda O‘zbekiston Farmatsevtika tarmog‘ini rivojlantirish agentligi va Hindistonning Ind-Swift Laboratories kompaniyasi o‘rtasida o‘zaro anglashuv memorandumi imzolandi.
Agentlik direktori Abdulla Azizov hindistonlik ishbilarmonlarga mamlakatimizda farmatsevtika sanoatini yanada rivojlantirish borasida amalga oshirilayotgan ishlar, xorijiy hamkorlar bilan hamkorlikda amalga oshirilayotgan loyihalar ko‘lami haqida ma’lumot berdi.
Ind-Swift Laboratories kompaniyasi vakillari so‘nggi yillarda O‘zbekiston hayotidagi innovatsiya jarayonlarini katta qiziqish bilan kuzatib borayotganini, xalqaro hamkorlik uchun yaratilgan qulay shart-sharoit va u keltirayotgan imtiyozlarni yaxshi bilishini ta’kidladi. Ishbilarmonlar mamlakatimizda saraton kasalligini davolovchi dori vositalari ishlab chiqarish bo‘yicha hamkorlikni yo‘lga qo‘yishdan manfaatdorligini bildirdi.
Uchrashuv yakunida agentlik va Ind-Swift Laboratories kompaniyasi o‘rtasida o‘zaro anglashuv memorandumi imzolandi. Mazkur hujjat ijrosi doirasida tomonlar o‘rtasidagi o‘zaro manfaatli aloqalar mustahkamlanib, qo‘shma loyihalar amalga oshiriladi.