Gruziya prezidenti etib tayinlangan Mixail Kavelashvili o‘tgan oy inauguratsiya kuni parlament tomonidan qabul qilingan 28 ta qonunni imzoladi.
Ular orasida norozilik namoyishlarida pirotexnika va niqoblardan foydalanishni taqiqlovchi qonun, Ichki ishlar vazirligi ishini yengillashtiruvchi politsiya to‘g‘risidagi qonun ham bor.
Bundan tashqari, Mixail Kavelashvili sobiq prezident Salome Zurabishvilini davlat himoyasidan foydalanish huquqidan mahrum qiluvchi tuzatishlar hamda davlat xizmati to‘g‘risidagi qonunga o‘zgartishlarni imzoladi. Faollarning aytishicha, tuzatishlar odamlarni siyosiy sabablarga ko‘ra ishdan bo‘shatish imkonini beradi.
“Ozodlik” radiosiga ko‘ra, bugundan boshlab bir qancha qonunlar kuchga kiradi. Inson huquqlari himoyachilari bu qonunlarni “repressiv, jazolovchi, cheklovchi va antidemokratik” deb baholaydilar.
14 dekabr kuni hukmron “Gruziya orzusi” partiyasi sobiq futbolchi Mixail Kavelashvilini mamlakat prezidenti lavozimiga sayladi. Kecha Tbilisida uning inauguratsiyasi vaqtida namoyishlar boʻlib oʻtdi.
Bir oydan ortiq vaqtdan beri gruzinlar parlament saylovlarini o‘tkazish va Yevropa integratsiyasi yo‘liga qaytishni talab qilib, har kuni norozilik namoyishlarini o‘tkazmoqda. Na muxolifat, na Salome Zurabishvili amaldagi hokimiyat institutlari, jumladan, parlament va prezidentning qonuniyligini tan olmaydi.