1 yanvar kuni Oʻzbekiston vakili Botir Tursunov Shanxay hamkorlik tashkiloti bosh kotibi oʻrinbosari lavozimini bajarishga kirishdi, deb xabar berdi “Dunyo” axborot agentligi.
Diplomat 50 yoshda. Toshkent davlat sharqshunoslik instituti (hozirgi Toshkent davlat sharqshunoslik universiteti) hamda O‘zbekiston Fanlar akademiyasi I.Mo‘minov nomidagi Falsafa va huquq institutini tamomlagan.
2005 yildan buyon Tashqi ishlar vazirligi, markaziy apparat va Pekindagi elchixonada turli lavozimlarda ishlagan. Prezident huzuridagi Strategik va mintaqalararo tadqiqotlar instituti direktori, Markaziy Osiyo xalqaro instituti direktori o‘rinbosari lavozimlarida ham ishlagan.
2023 yildan O‘zbekistonning Xitoydagi elchixonasi maslahatchisi-vakili, ShHT Kotibiyatining doimiy vakili.
Falsafa fanlari nomzodi, 25 dan ortiq ilmiy ishlar muallifi. Rus, ingliz va xitoy tillarini yaxshi biladi.