O‘zbekiston hukumati 2025-yilgacha 200 mingdan ortiq fuqaroni yuqori maosh oladigan mamlakatlarda ish bilan ta’minlashni rejalashtirmoqda.
2025 yilga borib 200 mingdan ortiq O‘zbekiston fuqarosi iqtisodiy rivojlangan mamlakatlarda ishlashi kutilmoqda. Bu haqda 20-noyabr kuni Oliy Majlis Qonunchilik palatasining majlisida bosh vazir Abdulla Aripov ma’lum qildi, deb yozadi “Gazeta.uz”.
Hukumat rahbari qayta tayinlanishidan oldin Vakillar palatasiga Vazirlar Mahkamasining qisqa muddatli va uzoq muddatli harakatlar dasturini taqdim etdi.
Xususan, 2030 yilgacha 10 yo‘nalish bo‘yicha 400 ta chora-tadbirlar amalga oshirilishi kutilmoqda. Dastur “O‘zbekiston-2030” strategiyasi asosida ishlab chiqilgan. Rejalashtirilgan chora-tadbirlar qatorida mehnat migratsiyasini tashkil etish ishlarini tizimli davom ettirish ham bor.
Abdulla Aripovga ko‘ra, prezident hukumatga mehnat muhojirlarini qo‘llab-quvvatlash, ularni ish haqi yuqori bo‘lgan mamlakatlarda ish bilan ta’minlash vazifalarini yuklagan.
“2025 yilga borib Germaniya, Buyuk Britaniya, Yaponiya, Janubiy Koreya, Isroil, Kanada, Polsha, Turkiya, Saudiya Arabistoni, BAA va boshqa iqtisodiy rivojlangan 21 davlatda 200 mingdan ortiq fuqaroni ish bilan taʼminlash choralarini koʻrish kutilmoqda. «, dedi hukumat rahbari.
Bosh vazir kelgusi yillarda ham bu boradagi ishlar davom ettirilishi va xorijda ishlash istagida bo‘lgan fuqarolarni kasbiy malaka va xorijiy tillarga o‘rgatish uchun barcha shart-sharoit yaratilishini aytdi.