Janubiy Koreyadagi aviahalokatning so‘nggi daqiqalari haqida ma’lumot yo‘qligi tergovni murakkablashtiradi.
Janubiy Koreyaning Muan aeroportida halokatga uchragan Jeju Air samolyotining ikkala qora qutisi ham parvozning so‘nggi daqiqalarida ishlamay qoldi. Janubiy Koreya transport vazirligining ma’lum qilishicha, qora qutilar voqea sodir bo‘lishidan to‘rt daqiqa oldin yozib olishni to‘xtatgan, deb xabar berdi Yonhap.
Qayd etilishicha, samolyot soat 9:03 da halokatga uchragan, har ikkala ma`lumot yozuvchi 8:59 da ma`lumotlarni yozib olishni to'xtatgan. Parvozning so‘nggi daqiqalarida ma’lumot yo‘qligi avariya bo‘yicha tergovni murakkablashtirdi. Biroq, agentlik ta'kidlaganidek, «qora qutilar» tergovchilar uchun mavjud bo'lgan yagona manba emas.
“Tergov turli ma’lumotlar manbalarini tahlil qilishni o‘z ichiga oladi, jumladan, havo harakatini boshqarish yozuvlari, avariya videosi va voqea joyidan qoldiqlar”, — deya tergov guruhi so‘zlaridan iqtibos keltirgan Yonhap agentligi.
Hozirda Vashingtonda Boeing 737-800 samolyotining “qora qutisi” tahlil qilinmoqda.
Bangkokdan Jeju Air reysi 2024-yil 29-dekabrda Janubiy Koreyaning Muan aeroportiga qo‘nayotganda halokatga uchragan. Samolyot beton konstruksiyaga urilgan va yonib ketgan. Hodisa oqibatida bortdagi 181 kishidan 179 nafari halok bo‘lgan. Faqat ikki ekipaj a'zosi tirik qolgan. Bu Koreya tarixidagi eng ko‘p qurbon bo‘lgan fojiadir.