Moldova maxsus xizmati o‘z hisobotida rossiyalik milliarder Roman Abramovich mamlakatdagi saylov va referendum jarayonida qonun buzilishiga aloqador bo‘lishi mumkinligini ta’kidladi.
Rossiyalik milliarder Roman Abramovich Moldovada prezidentlik saylovlari va Yevropa integratsiyasi bo‘yicha referendumdagi qonunbuzarliklarga aloqador bo‘lishi mumkin. Bu haqda mamlakat maxsus xizmatlari xabar berdi.
13 dekabr kuni Moldova xavfsizlik va axborot xizmati (SIS) direktori Aleksandru Mustiatse taqdim etgan hisobotda Rossiya saylov jarayoniga aralashishda ayblangan. Hujjatga ko‘ra, Moskvada Moldovadagi referendum va saylovlarni obro‘sizlantirishga qaratilgan operativ markaz tashkil etilgan. Markazni boshqarish moldovalik tadbirkor Ilan Shorga ishonib topshirildi va u keng moliyaviy, aloqa, texnik va logistika resurslari bilan ta’minlandi. Ushbu faoliyatga hissa qo'shganlar orasida Roman Abramovichning nomi ham tilga olingan.
SIS xabarlariga ko'ra, 2023 yilda Shor Abramovich bilan Frantsiyada tanishgan. Qayd etish joizki, aynan Abramovich Shor asos solgan “Pobeda” blokini Moldovadagi saylovlarda ishtirok etishini qo‘llab-quvvatlagan. Ushbu blokka huquqiy yordamni maxsus xizmatlar rossiyalik milliarderning shaxsiy yordamchisi deb ataydigan Rola Brentlin amalga oshiradi.
Moldovada prezidentlik saylovlari ikki turda bo‘lib o‘tdi: 20 oktyabr va 3 noyabr kunlari. Saylovda amaldagi prezident Maya Sandu g‘alaba qozondi. Birinchi turdagi saylovlar bilan bir vaqtda mamlakatning Yevropa Ittifoqiga qo‘shilishi bo‘yicha referendum bo‘lib o‘tdi – yakunda ko‘pchilik Yevropa integratsiyasini qo‘llab-quvvatladi.
2017 yilda Ilon Shor bank firibgarligi uchun 7,5 yilga qamalgan edi. Ammo u hukm ustidan apellyatsiya shikoyati berdi va uy qamog'iga o'tkazildi. 2019-yil iyun oyida Shor Moldovadan qochib ketgan va o‘tgan yilning bahorida u Rossiya fuqaroligini olgani ma’lum bo‘lgan edi.