Toshkent viloyati IIBB xodimlari tomonidan pirotexnika vositalarining noqonuniy aylanishining oldini olishga qaratilgan reyd-nazorat tadbirlari davom etmoqda.
Viloyat IIBB xabariga ko‘ra, 1987-yilda tug‘ilgan haydovchi (UB) boshqaruvidagi “Isuzu” yuk mashinasi Ohangaron tumanida YPX inspektorlari tomonidan ko‘zdan kechirilgan.
Natijada avtomashina bagajidan umumiy qiymati 30 million so‘mlik 2900 dona salyutlar aniqlandi.
Bundan tashqari, Farg‘ona-Toshkent yo‘nalishida harakatlanayotgan “Tracker” rusumli avtomashina ham Ohangaron tumani “Chinor” IIB huzuridagi ichki ishlar xodimlari tomonidan to‘xtatildi.
1989-yilda tug‘ilgan haydovchi B.M. boshqaruvidagi avtomashinani tekshirish chog‘ida yukxonada 57 ming 600 dona noqonuniy olib o‘tilgan pirotexnika va 348 quti tamaki mahsulotlari borligi aniqlangan.
Hozirda tegishli hujjatlar rasmiylashtirilib, tergovgacha tergov harakatlari olib borilmoqda.