Kuchli yomg‘ir Saudiya Arabistonining ko‘plab shaharlarida suv toshqiniga sabab bo‘ldi. Xususan, mamlakatning iqtisodiy poytaxti sifatida tanilgan Jidda shahrida yomg‘ir tufayli ko‘chalarni suv bosgan, shaharlar orasidagi yo‘llar shikastlangan. To‘fon Makka va Madinaga ham zarar yetkazdi, deb yozadi Saudi Gazette.
Khaleej Times tomonidan chop etilgan videolarda Makkadagi ziyoratchilar kuchli yomg'ir ostida qolganini ko'rish mumkin.
Meteorologlar mamlakatning ayrim hududlarida kuchli yomg'ir chorshanba kuniga qadar davom etishi haqida ogohlantirmoqda.
Mamlakat meteorologiya agentligi Makka, Madina va Jidda shaharlari uchun eng yuqori xavf haqida ogohlantirdi.
Saudiya Arabistonida qishda yog'ingarchilik kam uchraydi. Mamlakatda avvalgi kuchli yomg‘ir 2024-yilning aprel oyida sodir bo‘lgan, o‘shanda Ummon va BAAga ham yomon ob-havo ta’sir qilgan.