O‘zbekiston Jahon savdo tashkilotiga a’zo bo‘lish bo‘yicha AQSh bilan ikki tomonlama muzokaralarni yakunladi. Bu haqda O‘zbekiston Prezidentining Jahon savdo tashkiloti masalalari bo‘yicha maxsus vakili Azizbek O‘runov o‘zining LinkedIn’dagi sahifasida ma’lum qildi.
Uning so‘zlariga ko‘ra, 19 dekabr kuni Bosh vazir o‘rinbosari Jamshid Xo‘jayev va AQSh Savdo vakili Ketrin Tey tegishli protokolni imzolagan.
“Bu yil JST aʼzoligimiz uchun tarixiy yil boʻldi, yil yakunida juda istiqbolli natijalarga erishildi”, deb yozadi Azizbek Oʻrunov.
AQSH Savdo vakili Ketrin Teyning bayonotida Oʻzbekistonning Jahon savdo tashkilotiga aʼzo boʻlish borasidagi saʼy-harakatlari izchil davom etayotgani taʼkidlandi. Bayonotda O‘zbekiston 1994-yilda JSTga a’zo bo‘lish uchun ariza bergani va 2020-yildan buyon bu yo‘nalishda faol ish olib borayotgani qayd etilgan.
“O‘zbekistonning muzokaralarda jiddiy ishtirok etgani so‘nggi ikki yil davomidagi ikki tomonlama muzokaralarimiz muvaffaqiyatida muhim omil bo‘ldi”, — deyiladi xabarda.