“Manchester Siti” O‘zbekiston milliy terma jamoasi va Fransiyaning “Lans” klubi himoyachisi Abdug‘adir Husanovga qiziqish bildirmoqda. Bu haqda insayder Fabritsio Romano o‘zining Telegram-kanalida ma’lum qildi.
Manbalarga ko'ra, «Manchester Siti» ushbu futbolchini yanvar oyida bo'lishi mumkin bo'lgan transferlar ro'yxatiga kiritgan. Shuningdek, Xusanovga yana bir qancha top-klublar ham qiziqish bildirishgan.
Abdug'odir Xusanov 2023 yildan boshlab «Lans» safida to'p suradi. Futbolchining klub bilan shartnomasi 2027 yilda yakuniga etadi. Joriy mavsumda Xusanov klub safida barcha musobaqalarda 16 ta o'yin o'tkazgan.
Dekabr oyida O‘zbekiston terma jamoasi himoyachisi Markaziy Osiyoning eng qimmat futbolchisi sifatida e’tirof etilgani ma’lum bo‘ldi. Transfermarkt xabariga ko'ra, uning narxi 12 million yevro.
Avvalroq, o‘zbekistonlik sportchi oktabr oyida Fransiya chempionatining eng yaxshi yosh futbolchisi deb topilgandi. Bundan tashqari, 2024 yilning noyabr oyida ushbu futbolchiga Angliyaning “Tottenxem” klubi ham qiziqish bildirayotgani ma’lum bo‘lgandi.