National Geographic tashabbusi bilan tashkil etilgan ekspeditsiya davomida olimlar Solomon orollarida dunyodagi eng katta marjon turini aniqladilar. Ushbu marjonning kattaligi zamonaviy dunyodagi eng katta mavjudot – ko'k kitga teng.
Marjonning kengligi 34 metr, diametri 32 metr va balandligi 5,5 metr. Olimlarning fikricha, bu marjon turining yoshi 300 yildan oshishi mumkin. Marjonning sog'lig'i tadqiqotchilar uchun «umid chirog'idir», chunki yaqin atrofdagi boshqa yirik marjonlarga iqlim o'zgarishi va okean suvlarining isishi tahdid solmoqda.
Ekspeditsiya davomida National Geographic operatori M. San Feliks xaritaga tushirilgan kemaning suv ostidagi qoldiqlarini qidirish chog‘ida bu ulkan marjonni topdi. San-Feliks bu kashfiyotni tarixiy kashfiyotga qiyosladi va uni «bahaybat suv osti soborini ko'rish hissi» deb ta'rifladi.
Olimlarning fikricha, marjonning bunday turini aniqlash fan uchun juda muhimdir. Avvalgi eng katta marjon Amerika Samoa milliy dengiz qo‘riqxonasida joylashgan, diametri 22,2 metr va yoshi 500 yildan ortiq bo‘lgan Big Momma edi.
Yangi topilgan marjonning joylashuvi uni yaxshi holatda saqlagan bo'lishi mumkin. U katta chuqurlikda va bo'ronlar ta'siridan tashqarida joylashganligi sababli, iqlim o'zgarishi va global isishdan unchalik ta'sirlanmaydi.
Olimlar bu marjonni Pavona klavus deb aniqladilar, bu esa yirik dengiz organizmlari uchun muhim yashash muhitini ta'minlaydi. Solomon orollari hukumati bu kashfiyot hududga ko‘proq sayyohlarni jalb qilishiga umid qilmoqda.