Xudoyberdiyev Nurshod Nurmamatovich Namangan viloyati qishloq xo‘jaligi boshqarmasi boshlig‘i etib tayinlandi. Bu haqda viloyat hokimiyatiga xabar qilinadi.
Ta’kidlash joizki, mazkur tayinlov respublika qishloq xo‘jaligi vazirining tegishli buyrug‘iga asosan amalga oshirilgan.
Nurshod Xudoyberdiyev 1983 yilda Namangan viloyati, Yangiqo‘rg‘on tumanida tug‘ilgan. Maʼlumoti oliy, 2004-yilda Namangan texnika-pedagogika institutini tamomlagan.
Faoliyati davomida Namangan viloyati “Suvnazorat” inspektsiyasida turli lavozimlarda ishlagan. 2015-2016-yillarda Mingbuloq tumani Zardaryo irrigatsiya tizimlari boshqarmasi boshlig‘i. 2016-2017-yillarda “Norin-Sirdaryo” irrigatsiya tizimi boshqarmasi boshlig‘i o‘rinbosari, 2017-2019-yillarda “Norin-Sirdaryo” havza tizimi boshqarmasi boshlig‘i lavozimlarida ishlagan.
Nurshod Xudoyberdiyev 2019-yildan 2024-yil avgustigacha Namangan viloyati Mingbulok tumani hokimi lavozimida ishlab kelgan.
2024-yil 17-iyul kuni Prezident Shavkat Mirziyoyev raisligida hududlarda iqtisodiy o‘sish sur’atlariga bag‘ishlangan videoselektor yig‘ilishida tizimli kamchiliklar tufayli Nurshod Xudoyberdiyev qatori bir qator tumanlar rahbarlari ham lavozimidan ozod etildi.