Prezident Shavkat Mirziyoyev Abu-Dabiga tashrifi doirasida Birlashgan Arab Amirliklari Investitsiyalar vaziri, “ADQ” kompaniyasi bosh direktori Muhammad Hasan al-Suvaydiy boshchiligidagi mamlakatimizning yetakchi kompaniyalari delegatsiyasi bilan uchrashdi.
Yuqori texnologiyali tarmoqlarda amaliy hamkorlikni rivojlantirish va investitsiya portfelini kengaytirish imkoniyatlari ko‘rib chiqildi.
Birlashgan Arab Amirliklari bilan iqtisodiyotning ko‘plab sohalarida hamkorlik jadal rivojlanayotganini mamnuniyat bilan qayd etish lozim. Investitsiyalar, sanoat va ilg‘or texnologiyalarni rivojlantirishga qaratilgan umumiy chora-tadbirlar amalga oshirilmoqda.
Har bir kompaniya bilan o‘zaro manfaatli hamkorlikni kengaytirish bo‘yicha navbatdagi qadamlar belgilandi. Infratuzilmani rivojlantirish, shaharsozlik, energetika, transport va logistika, tog‘-kon sanoati, elektrotexnika, kommunal xo‘jaligi va boshqa sohalardagi qo‘shma loyihalar muhokama qilindi.
Ilg‘or texnologiyalarni qo‘llash, qimmatbaho metall konlarini o‘zlashtirish, hududiy temir yo‘llarni rivojlantirish va “quruq” portlarni tashkil etish, kabel mahsulotlari ishlab chiqarish loyihalarini jadallashtirish, ta’lim va tibbiyot sohalarida DXSh loyihalarini ilgari surish bo‘yicha kelishuvlarga erishildi.
Uchrashuv yakunida amaliy hamkorlikning barcha yo‘nalishlari bo‘yicha “yo‘l xaritasi”ni qabul qilishga kelishib olindi.