O‘zbekiston Respublikasi Prezidenti Shavkat Mirziyoyev Rossiya Federatsiyasi Prezidenti Vladimir Putinning taklifiga binoan BRIKS sammitida ishtirok etish uchun 23-24-oktabr kunlari amaliy tashrif bilan Qozon shahrida bo‘ladi.
Davlatimiz rahbari Rossiya tomoni raisligida BRIKS plyus formatidagi yalpi majlisda nutq so‘zlaydi.
Yig‘ilish kun tartibiga har tomonlama va barqaror rivojlanishni ta’minlash maqsadida xalqaro hamkorlikni kengaytirish masalalari kiritildi. Shuningdek, global siyosatning dolzarb jihatlari ham muhokama qilinadi.
Bundan tashqari, tashrif dasturi doirasida bir qator ikki tomonlama uchrashuvlar o‘tkazilishi kutilmoqda.
BRIKS assotsiatsiyasi 2006 yilda tashkil etilgan. Hozirda Braziliya, Rossiya, Hindiston, Xitoy, Janubiy Afrika Respublikasi, Birlashgan Arab Amirliklari, Eron, Misr va Efiopiya ushbu tashkilotga aʼzo.