Ispaniya bosh vaziri Pedro Sanchesning aytishicha, jabrlangan hududlarga 5000 askar va yana ko‘p politsiyachi boradi. Shunday qilib, suv toshqini oqibatlarini bartaraf etishda ishtirok etayotgan huquq-tartibot organlari vakillarining umumiy soni 17,5 ming kishini tashkil etadi.
«Gap mamlakatimizdagi favqulodda xizmatlar va harbiylarning tinchlik davridagi eng yirik operatsiyasi haqida ketmoqda», dedi Sanches.
U Valensiyadagi suv toshqinlarini Ispaniya bu asrda boshdan kechirgan eng dahshatli tabiiy ofat deb atadi.
Ispaniya ichki ishlar vaziri Fernando Grande-Marlaska juma kuni Cadena Ser radiosiga bergan intervyusida suv toshqinlarida 207 kishi halok bo‘lganini, ammo qidiruv davom etar ekan, bu raqam ortishi mumkinligini aytdi.