Saudiya Arabistonining “Al-Hilol” klubi Italiyaning “Roma” jamoasi va Argentina terma jamoasi hujumchisi Paulo Dibalaga 2025 yili AQSHda bo‘lib o‘tadigan Klublar o‘rtasidagi jahon chempionatida jamoa safida ishtirok etish uchun oyiga 10 million yevro taklif qilgan. Bu haqda jurnalist Sesar Luis Merlo X ijtimoiy tarmog‘ida (avvalgi Twitter) xabar berdi.
Manba ma’lumotlariga ko‘ra, argentinalik futbolchi ushbu miqdordagi maoshni “Al-Hilol” safida bir oylik ishtirok uchun qo‘lga kiritishi mumkin edi. Mazkur klub KCHMning “H” guruhida Madridning “Real”, Avstriyaning “Red Bull” va Meksikaning “Pachuka” klublariga qarshi o‘ynaydi. Ma’lum qilinishicha, Dibala bu taklifni rad etgan.
Paulo Dibala 2022 yil yozida “Roma”ga o‘tgan. Yakunlangan mavsumda u A Seriyada 24 ta o‘yinda maydonga tushib, 6 ta gol va 3 ta golli uzatmani o‘z hisobiga yozib qo‘ygan.