«Manchester Yunayted» bosh murabbiyi Ruben Amorim jamoaning 30 nafar xodimi uchun «Tottenxem»ga qarshi bo‘ladigan Yevropa Ligasi final uchrashuviga chiptalarni shaxsan to‘lab berdi. Bu haqda “ESPN” xabar bermoqda.
Qit’aning ikkinchi muhim musobaqasi — Yevropa Ligasi finali Ispaniyaning Bilbao shahridagi «San-Mames Barriya» stadionida bo‘lib o‘tadi. Bellashuv 21 may, chorshanba kuniga belgilangan.
Manbalarga ko‘ra, «Manchester Yunayted» murabbiylar shtabi a’zolari va fizioterapevtlarga final o‘yiniga o‘z hisobiga borishlarini ma’lum qilgan. Shu sababli, Ruben Amorim klub xodimlari va ularning oila a’zolarining safar xarajatlarini o‘z zimmasiga olgan.
Avvalroq OAVda tarqalgan xabarlarga ko‘ra, «Manchester Yunayted» rahbariyati Yevropa Ligasi finali uchun chiptalar o‘rniga barcha xodimlarga bepul ovqatlanish uchun kuponlar tarqatishni rejalashtirgani ma’lum bo‘lgan edi.