«Barselona» klubi «Liverpul» hujumchilari Muhammad Saloh va Luis Dias kelajagini diqqat bilan kuzatmoqda. Sababi, mersisaydliklar yozgi mavsumda katta qayta qurish jarayonini boshlashi mumkin. Bu haqda Footmercato nashri xabar bermoqda.
Manbaning ma’lumotiga ko‘ra, avvalroq kataloniyaliklar asosiy e’tiborni kolumbiyalik futbolchi Diasga qaratgan. Jamoaning sport direktori Deku uning uslubi va xususiyatlari hozirgi «Barselona» tarkibiga mos keladi, deb hisoblagan.
Biroq hozirgi holatda kataloniyaliklar Salohni tanlashga qaror qilishgan. Chunki misrlik hujumchining shartnomasi mavsum yakunida tugaydi va uni erkin agent sifatida bepul qo‘shib olish mumkin.
Shuningdek, «Barselona» bir vaqtning o‘zida har ikkala futbolchini transfer qilish niyatida emasligi ta’kidlangan.