O‘zbekistonlik bokschi Akmaljon Isroilov Angliyaning Liverpul shahrida o‘tayotgan boks bo‘yicha jahon chempionati yarim finalida ringga ko‘tarildi.
85 kg vazn toifasidagi yarim finalda Isroilov Avstriya vakili Mixael Fares Deruishga qarshi jang qildi va raqibga hech qanday imkoniyat qoldirmagan holda 5:0 hisobida g‘alaba qozondi. To‘rt nafar hakam uchrashuvni 30–27 hisobida, yana biri esa 30–25 hisobida o‘zbekistonlik sportchi foydasiga baholadi.
Shu tariqa, Akmaljon Isroilov finalga yo‘l oldi va «oltin» medal uchun ingliz bokser Stott Tign bilan kuch sinashadi. Mixael Fares Deruish esa jahon chempionatida bronza medali sohibiga aylandi.