Maftuna Shoyimova! Balki hayron qolayotgandirsiz, muhtaram muxlis! Abduqodir Husanov, Abbos Fayzullayev yoki Eldor Shomurodov emas, nega endi Maftuna Shoyimova?
Bugun bu ism-familiyani tor doirada yaxshi bilishadi. Endi Maftuna asta-asta keng jamoatchilik, xususan, ayollar o‘rtasida ham mashhurlashsa, ajabmas! Biz shunday yo‘l tutdik. Mulohazalarimizni shu ism-familiya bilan boshladik. Buning sababi bor, albatta. Bosh maqolani yozishga kirishganimizda, futzal bo‘yicha O‘zbekiston ayollar terma jamoasi OK-2025 saralash bosqichi doirasida turkmanistonliklarga qarshi parketga tushishdi. Uchrashuvning dastlabki daqiqalarini diqqat bilan tomosha qildik. Futzalchilarimizda shasht-shijoat juda baland. Ayniqsa, Maftuna Shoyimova yuzaga keltirilgan har bir xavfli vaziyatdan unumli foydalanishga intilmoqda. U 3ta gol urib, «xet-trik»ni rasmiylashtirgach, sharhlovchi Murod Rizayev ham o‘ta ko‘tarinki kayfiyatda ta’rif-tavsif berishga kirishdi. Xususan, Maftunaning Avstraliya terma bilan bo‘lgan qiyin bahsda qatnasholmaganidan o‘zicha hikmat izladi. Keyin hal qiluvchi ahamiyatga ega o‘yin tomoshasidan arang uzilib, tahririyat intizorlik bilan kutib turgan mulohazalarni qoralashga tutindik…
O‘yladikki, muxlislar nihoyat, «Futbol-TV»da muhim uchrashuvni jonli tarzda tomosha qilib, rosa miriqishadi. Har ehtimolga qarshi o‘sha lahzada «Sport-TV» qanday ko‘rsatuv uzatayotgani bilan qiziqdik. Yo‘q, muhim o‘yin «Sport-TV»da ham namoyish etilmayapti. Kanalda OKMK – «Dinamo» uchrashuvi takroran ko‘rsatilyapti. Bir haftacha oldin «Futbol-TV» ham ayni shu eski uchrashuvni efirga qo‘ygandi. O‘shanda oltinko‘llik faxriy muxlis hafsalasi pir holda, bizga yozg‘irgandi, ko‘nglidagilarni to‘kib-solgandi: «Keksa futbol muxlislarining arz-dodlarini hech kim tinglamayapti. Avvallari «InterFutbol»ni vaqtida olardik. Gazetaning har ikki soni sifatli chop etilardi. Hozir esa seshanba soni payshanba kuni yetib kelyapti. Boz ustiga, mahkamlanmagan varaqlar sotuvchi qo‘lida sochilib yotibdi. Boz ustiga, payshanba soni biz tomonlarga umuman kelmayapti. «Futbol-TV» ish boshlashini katta umidlar bilan kutgandik. Telekanal esa barchaga ma’lum uchrashuvlarni takror-takror efirga uzatib, zeriktirmoqda kishini. Aytib qo‘yinglar, zerikarli eski o‘yinlarni beraverishdan ko‘ra, futbol tarixiga oid turli filmlar namoyish qilingani ma’qul!».
G‘anijon akaga APL translyasiyasi masalasi mablag‘ga borib taqalishi xususida so‘z ochmadik, aksincha, hammasi yaxshi bo‘lishini ta’kidlab, o‘zimizcha tasalli berdik. Ishonchimiz komilki, G‘anijon aka va u kishi kabi fidoyi muxlislar ayollar futzalini ham zavq bilan tomosha qilishadi. Fevral oyining ikkinchi yarmida esa O‘zbekiston U-20 termasining Osiyo chempionatidagi o‘yinlarini jonli tarzda kuzatib, yayrab-yashnashga ilhaqlar. Agar «Futbol-TV» mutasaddilari Xitoyda bo‘ladigan nufuzli turnir uchrashuvlarini jonli tarzda efirga uzatib, translyasiyaga taniqli sharhlovchilarni jalb etishsa va yosh futbolchilarimiz muvaffaqiyatli o‘ynashsa, hamma ginaxonliklar o‘z-o‘zidan unutiladi…
Shu joyga kelganimizda, qo‘shni xonadan «Gol! To‘rtinchisi! Yana Maftuna Shoyimova!» – degan hayqiriq eshitildi. Yaxshi! Davom etamiz. Abduqodir Husanovning «Manchester Siti»ga o‘tishi masalasi Abu-Dabida Prezident Shavkat Mirziyoyev va valiahd shahzoda o‘rtasidagi suhbatda tilga olinganidan o‘zbekistonlik barcha muxlislar beixtiyor faxr tuyishdi. Davlatimiz rahbari ham suhbat chog‘i o‘zbekning yosh va mard o‘g‘loni yutug‘idan mamnunligini quvonch bilan ta’kidladi. Arab shayxlari har qaysi futbolchi uchun ham saxiylik bilan bu qadar mo‘may mablag‘ sarflashavermaydi. Shu ma’noda O‘zbekiston rahbarining asnosida Abduqodir Husanov beixtiyor mamlakatimiz yosh avlodining o‘ziga xos timsoli, brendiga aylandi. Farhod Nishonov U-20 termasining yangi avlodi safidan yana Abduqodir Husanovlarni qidirishlari haqida so‘zladi va u ming karra haq. Xitoyda bo‘ladigan yoshlar miqyosidagi Osiyo chempionatida agentlar, skautlar Farhod Nishonov shogirdlariga alohida e’tibor qaratishlari turgan gap. Qarang, birgina yosh iste’dodning yutuqlari ortidan mamlakatimiz futboliga shu qadar qiziqish!
Xayriyatki, vaqtida «Energetik-BGU» Abduqodirni quchoq ochib qarshi olgani. Belaruslik mutaxassislarga har qancha minnatdorchilik izhor etsak arziydi. Xo‘sh, o‘zimiznikilarga-chi? Nima sababdan ular Abduqodir timsolida bo‘lajak katta futbolchi voyaga yetayotganini ko‘ra bilishmadi? Ko‘ra bilishmadimi yoki ko‘rishni istashmadimi? Shu o‘rinda e’tirof etaylik, o‘zbekistonlik futbol mutaxassislari jahonning turli hududlarida faoliyat yuritayotgan hamkasblaridan saviya bobida aslo ortda emaslar. Aks holda, milliy jamoamizning aksariyat yetakchilari bugun xorijda legioner maqomida to‘p surishmasdi.
Qo‘shni xonadan takror hayqiriq: «Gol! Beshinchisi! Yana Maftuna Shoyimova!» Nimalar bo‘lyapti o‘zi? Mulohazalarimizni Maftuna Shoyimova bilan boshlaganimizda, bunday natijani o‘ylab ham ko‘rmagandik. Har bir ishda hikmat yashirin. Nuqul erkaklar futbolining yutuq va muammolarini yozib, Abduqodir Husanov kabi legionerlarimizni olqishlab, ayollar seektoriga e’tibor qaratmayotganimizdan o‘zimizcha xijolat tortib yurgandik. Shuni nazarda tutib, bu safar barchasini Maftuna Shoyimovaga bog‘lashni o‘ylaganimiz – ayni haqiqat. Qarang, rejamiz o‘zini, Maftuna esa ishonchimizni oqladi. U muhim uchrashuvda «penta-trik» qayd etish orqali «Futbol olamida biz ham bormiz!» – deya o‘zini eslatib qo‘ydi va soha jurnalistlarini adolatni ushlashga chorladi go‘yo. Barakalla, Maftuna! E’tiborni tortish, Vatan sharafini himoyalash bobida yigitlardan aslo kam emasliklaringizni isbotladinglar! Qoyil! Maftuna Shoyimova va Abduqodir Husanov kabi iste’dodlar jonajon O‘zbekistonimizda juda ko‘p. Hamma gap shu iqtidorlarni topish, sayqallash va jahon futbol bozoriga havola etishda!
Mamlakatimizdagi futbol mutaxassislari saviyasi ham chakki emasligini bejiz eslatmadik. Faqat bir jihat bor – ular iste’dodning kelajagi haqida qayg‘urish masalasida har doim ham astoydil kurashaverishmaydi. Hatto «Biz o‘zimizga tegishli ishni bajardik. Yosh futbolchining unib-o‘sishida bor kuchimiz, bilimimizni ayamadik. Endi hammasi uning o‘ziga bog‘liq. Kurashsa va raqobatda yutib chiqsa, katta futbolchiga aylanadi. Imkon topolmasa, bu ishni uddalay olmasa, boshqalar qatori tirikchilik aravasini tortaveradi!» qabilida yoqimsiz «falsafa» ham yo‘q emas. Ayni shu «falsafa» ta’siri o‘laroq, ne-ne iste’dodlar, Abduqodir Husanov va Eldor Shomurodov kabi yevroarenalarda to‘p surishga qodir yigitlarimiz shundoq ko‘z o‘ngimizda futbolni alam, afsus bilan tashlashganini unutmaslik darkor aslo.
Yana savol tug‘iladi: «Agar «Energetik-BGU» va «Lans» bo‘lmaganida ham, Abduqodir Husanov «Manchester Siti» nazariga tusharmidi?» Ochig‘i, bu savolga jo‘yali javob berolmaymiz. Biroq O‘zbekiston futbol muhitida bu kabi yuksak transferlarni amalga oshirish fantastik hodisa ekanligini ta’kidlovchilar haddan ortiq ko‘pligi kishini o‘yga toldiradi. Nahotki, «Lans» qurtdek sanab olgan yevromillionlarni «Bunyodkor», «Paxtakor» yoki boshqa bir klub qo‘lga kiritishni xohlamasa?! Xohlashi aniq! Xohishning ro‘yobga chiqishi uchun bitta aniq shart bor: uning nomi – adolat! Darvoqe, mulohazalarimizni yakunlar ekanmiz, teleekrandan Murod Rizayevning shodon ovozi yangradi: «Futzalchi qizlarimiz Xitoyda bo‘lib o‘tadigan Osiyo kubogi final bosqichiga yo‘l olishdi!» Tabriklaymiz! Omad yor bo‘lsin!
Muhammad tanlov