Qozog‘iston terma jamoasi himoyachisi Sergey Maliy jurnalist Anuar Abdrahmanov bilan suhbatda o‘zbekistonliklarning futboldagi yutuqlari sababini aytdi va Qozog‘iston futboli darajasini baholadi. Bu haqda Sports.kz xabar bermoqda.
«Ularda futbolni rivojlantirish bo‘yicha davlat darajasida topshiriq bo‘lgan va bu katta turtki berdi. Oradan vaqt o‘tib, buning samarasi ko‘rina boshladi. Bizda mamlakat ichida infratuzilmada o‘sish bo‘lmagunicha, natija talab qilish unchalik to‘g‘ri emas. Avvalo, uyni poydevordan qurish kerak, so‘ngra natija talab qilish mumkin. Bizda qanday maydonlar bor, qanday futbol bor — shunga qarab rivojlanyapmiz. Biz to‘g‘ri yo‘nalishdamiz, murabbiy Yevropacha impuls berayapti, lekin infratuzilmasiz bu juda uzoq yo‘l. Shuning uchun vaqt, qo‘llab-quvvatlash va ichki rivojlanish kerak.
Qarang, qayerda o‘ynayapmiz? Atirauga qarang, Aktaudagi stadionga qarang. Qanday darajadagi futbolni istaysiz? Bizning chempionat bahordayoq kurash bilan boshlanadi. Yevropa stiliga yaqinlashishimiz bilan biroz jonlanish bo‘ladi, futbol ko‘rsata boshlaymiz. Lekin biz rivojlanmayapmiz, bitta nuqtada turib qolganmiz. Millatlar ligasida bir bor natija berdik — va hammasi shu bilan tugadi. U natijadan keyin stadionlar rivojlanishi, har bir sovuq shaharda manejlar qurilishi kerak edi — masalan, Aktobeda. Manejlar, unga odamlar keladi, futbol ko‘radi, futbolchilar esa sifatli sharoitda to‘p tepadi.
Shuning uchun biz “bitta oyog‘imiz shol” holda yuribmiz, chunki futbolni aldab bo‘lmaydi. Biz natija berdik, shundan xursand bo‘lib yubordik va uni qonuniyat deb qabul qildik. Lekin u paytda nimadir qilish kerak edi, rivojlanishni davom ettirish kerak edi, ammo biz bitta nuqtada to‘xtab qoldik», — dedi Maliy.
Eslatib o‘tamiz, Qozog‘iston terma jamoasi JCH-2026 saralash bosqichidagi ilk uy o‘yinida Shimoliy Makedoniyaga 0:1 hisobida mag‘lub bo‘ldi. “Ordabasi” klubi a’zosi bo‘lgan Sergey Maliy ushbu uchrashuvni asosiy tarkibda boshladi.