«Roma» klubi 36 yoshli markaziy himoyachi Mats Xummels bilan shartnomani uzaytirishni rejalashtirmayapti. Bu haqda jurnalist Patrik Berger X (ilgarigi Twitter) ijtimoiy tarmog‘ida xabar berdi.
Germaniyalik himoyachi jamoaga o‘tgan sentyabr oyida qo‘shilgan edi. Uning amaldagi shartnomasi ushbu yozgacha davom etadi. Manbaning ma’lumotlariga ko‘ra, Xummels mavsum oxirida «Roma»ni tark etishi ehtimoli katta.
Joriy mavsumda tajribali himoyachi barcha musobaqalarda 17 ta o‘yinda ishtirok etdi va 1 ta gol urdi. Transfermarkt ma’lumotlariga ko‘ra, 36 yoshli futbolchining bozor bahosi €3,5 mln etib belgilangan.