“Nasaf” – “Andijon” (1:1) o‘yinidan keyingi matbuot anjumanining ikkinchi qismida mezbonlar ustozi Ro‘ziqul Berdiyev jurnalistlarning savollariga javob berdi.
– E’tiborsizlik bilan o‘yinni boshladik. Raqibga yanada zichroq himoyalanish uchun yaxshigina imkoniyat yaratib berdik. Shu bois g‘alabani o‘nglash uchun juda ham qiynaldik. Raqib 0:1 dan keyin ko‘proq natija uchun harakat qildi. Standart vaziyatlarda yoki darvozaga zarbalar berishda aniqroq harakat qilishimiz kerak edi. Menimcha, shu narsa yetishmadi.
– Ro‘ziqul Sa’dullayevich, doim shunaqa bo‘ladi: “Nasaf” birinchi bo‘lib gol o‘tkazganda hamisha qiynaladi. “Andijon” zo‘r himoyalandi…
– Agar darvozaga berilgan zarbalarda aniqroq harakat qilganimizda balki boshqa natija bo‘lishi mumkin edi. Zarbadagi xatolarimiz ularga qo‘l keldi. Mashg‘ulotda qancha bu haqida gapirmaylik, o‘yinda bu vaziyat boshqacha bo‘ladi. Bosimda harakat qilganda aniqlik yetishmaydi. Xotirjamlikni saqlab qolishimiz kerak. Chempionat shunaqa natijalar bilan qiziq bo‘lyapti. Oldimizda keyingi o‘yinlar bor.
– Legionerlar masalasida doim savollar tug‘ilyapti. Hali kelgani yo‘q deyishmoqda. Sabab nima?
– Oldingi safar aytdik, vizani juda kech olishdi. Keyingisi ham keldi, Toshkentda tibbiy ko‘rikdan o‘tadi. Ularni holatini yaxshilashimiz kerak. Legioner masalasida variantlarimiz juda ko‘p edi. Lekin nimadir sabablar bo‘lib, bularga to‘xtalishga majbur bo‘ldik. O‘ylaymanki, ularni boshqa o‘yinlar davomida rotasiya qilishga, qayerdadir toliqishlar bo‘lsa almashtirishga imkoniyat qilib taklif qildik. Bizga qo‘shimcha kuch bo‘ladi, degan umiddamiz.
– Bu yil “Nasaf” bilan “Andijon” OCHLda ishtirok etishadi. Jamoangizning bu boradagi vazifasi qanday va ilk bor qatnashadigan “Andijon”ning imkoniyatlarini qanday baholaysiz?
– Ikkala jamoaga ham omad tilaymiz. “Andijon” ham yaxshi tarkib qilishga harakat qilyapti. Ko‘p o‘yinchilarini o‘zgartirdi. Bizni vazifamiz turnirda g‘olib chiqish emas, munosib ishtirok etish. Imkon qadar guruh bosqichidan o‘tishga harakat qilamiz. Bu oson emas. Yil boshidan bu yilgi og‘ir mavsumga tayyorgarlik ko‘rdik. Chempionlikni himoya qilish ham juda og‘ir bo‘ladi. Shunga qaramasdan jamoamiz xotirjam harakat qilyapti. O‘ylaymanki, albatta maqsadimizga erishamiz.
– Debyut qilgan Shalani o‘yinini qanday baholaysiz?
– Endi birinchi o‘yin. Ko‘rdinglar, biz bilan mashg‘ulotga ikki marta qatnashdi. Kuchli taraflari bor. Bundan foydalanishimiz kerak. Tezkor, birga-bir va qarshi hujumlarda yaxshi harakat qilish mumkin.