Yashin tezligida o‘zgarib turadigan hozirgi zamonda vaqtinchalikdan doimiyroq narsa yo‘q iborasi aktual bo‘lib qoldi.
Xususan, futbol murabbiylarining faoliyati avvalgidan yanada qisqaroq. Har qanday jamoada 5 yildan ko‘proq ishlagan murabbiy bugungi kadrlar qo‘nimsizligi davrida o‘ta nodir namuna bo‘lib qolmoqda. Biroq mavjud umumiy moyillik orasida istisnolar ham topiladi. Yevropada o‘z klublarida katta stajga ega bo‘lgan amaldagi «dinozavrlar» ro‘yxatini tobora oshib borish tartibida joylashtirdik.
Isak YECHL pley-off o‘yinlariga munosib
Yaqinda angliyalik yosh mutaxassis Eddi Xau «Nyukasl»da muammolarga duch kelganida, uning iste’foga chiqarilishi xususida gap-so‘zlar ko‘paygandi. Biroq sa’y-harakatlari tufayli puxta shakl-langan jamoa kamchiliklarni bartaraf etdi. «Hakkalar» hozir APLda 5-o‘rinni band etib, «Manchester Siti»dan oldinda borishmoqda. Shuningdek, jamoa Liga Kubogi yarim finalining dastlabki bahsida «Arsenal»ga qarshi maydonga tushib, Londondan zafar (2:0) bilan qaytdi. O‘yindagi hisobni ochgan shvesiyalik hujumchi Isak, tanaffusdan keyin Gordonni assist bilan ta’minlab, g‘alabani mustahkamladi. «To‘pchilar» hujumni kuchaytirishganda, «hakkalar» himoyaga o‘tib olishdi.
5-4-1, ba’zan 5-5-0 sxemasida ham sermazmun o‘yin ko‘rsatish mumkin. Buning uchun Isakni zaxiraga olishga to‘g‘ri keldi, lekin bu paytda Aleksander hisobdagi ustunlikni ta’minlab qo‘ygandi. Darvozaga yo‘llangan 4ta aniq zarbaning ikkitasini golga aylantirgan «hakkalar» o‘z darvozalari daxlsizligini saqlab qolishdi. Ayni pallada Isak Xolanddan zo‘rroq ekanligini e’tirof etishga arziydigan natija. Norvegiyalik baquvvat kasbdoshidan farqli ravishda, shvesiyalik hujumchi jamoa uchun o‘ynash ilmini yaxshi o‘zlashtirib olgan. Terma jamoada uning Dyokereshdek sermahsul sherigi bor.
«Arsenal» skautlari hujumchilar ro‘yxatiga «to‘qqizlik» qidirishmoqda
O‘yindan keyin Arteta hujumning samarasizligidan nolidi. «To‘pchilar»ning 23 zarbasidan atigi 3tasi aniq bo‘ldi, lekin Dubravka xatoga yo‘l qo‘ymadi. Martinelli esa chap qanotda o‘ta sust o‘yin ko‘rsatdi. Hozir uning o‘rniga Ispaniya terma jamoasidagi Yevropa chempioni Niko Uilyamsni olib kelishmoqchi. Shuningdek, Kvarasxeliya ham tez-tez tilga olinmoqda. Biroq uni neapolliklardan tortib olish oson emas. Markazga ham ko‘pchilikni ko‘rib chiqishdi. Osimxen va Dyokeresh varianti qoniqtirmadi, chunki ular bo‘shliqqa ega jamoalarda to‘p surishgan. «To‘pchilar»ga esa jarima maydonchasi markazida o‘ynaydigan qirol o‘yinchi kerak.
Isak «Arsenal» talabini qondirishi mumkin. Garchi u «hakkalar» safida 1-2ta xatoga yo‘l qo‘ygan bo‘lsada, keskin vaziyatlarda hushyorlikni yo‘qotmaydi. Hozir Aleksander APLdagi gollari bo‘yicha Xolanddan ortda (13ga 16) bormoqda, lekin u to‘pni ko‘p nazorat qiladigan «Siti»da o‘ynamasligini ham inobatga olish lozim. Shuningdek, Isak so‘nggi 9ta o‘yinda 10ta gol va 2ta assistni rasmiylashtirgan. U Gordon, Merfi va Joelintonlar bilan ajoyib kombinasiyalarni amalga oshiradi. Xoland esa hujumkor xavbeklar bilan avvalgidek hamjihatlikda to‘p sura olmayapti.
Isak top-klubda munosib o‘ynay olishini allaqachon isbotlagan va kamchiliklarga barham bermoqda. Xoland esa «Siti» uchun murakkab bo‘lgan o‘yinlarda muammolarga duch kelmoqda. To‘g‘ri, u iqtidorli hujumchi, gol mashinasi. Lekin unga dadillik yetishmayapti. Isak ham ayrim uchrashuvlarni talab darajasida o‘tkaza olmadi. Biroq hozir Endi Koul va Alan Shirerdek «Nyukasl» afsonalari maqomiga ko‘tarilib oldi. Ortda qolgan yilda Aleksander APL doirasida 25ta golni rasmiylashtirdi. Boshqa hujumchilar bunday ko‘rsatkich bilan maqtana olmaydilar.
Angliyada Isakni hozirning o‘zida eng yaxshi markaziy hujumchi deyish mumkinmi, degan savolni xush ko‘rishadi. Buning ahamiyati yo‘q. Savol voqelikni o‘zgartirmaydi. 25 yoshli hujumchi ayni ochilgan davrini o‘tkazmoqda, kamchiliklardan forig‘ bo‘lishga intilmoqda. U «Borussiya Dortmund»dan «Real Sosyedad»ga o‘tgan paytida ham yuksak mahoratga ega edi. APLdagi 2,5 mavsum buni tasdiqladi. Endi Isak navbatdagi klubni to‘g‘ri tanlashi lozim.
Tarkibga «to‘qqizlik» izlayotgan Artetaning bezovtaligini tushunish qiyin emas. «Nyukasl»ga qarshi o‘yinlardan keyin hamma Mikelni xato qilganlikda ayblaydi. Bukayo Sakaning jarohatidan keyin chempionlikka xos tarkibni shakllantira olmasa, imkoniyatni boy bergan bo‘ladi. Agar Isak «to‘pchilar» safiga o‘tsa, jamoaning zafarli yurishi yanada kuchayadi. Chunki Aleksander o‘z faoliyatida turli pozisiyalarda samarali to‘p surganligi yuqorida bayon etildi. O‘tgan mavsumda u APLdagi eng yaxshi straykerlar ro‘yxatidan joy olganligi bejiz emas, albatta.
Transferlar jarayonida doimo o‘yin sur’atining pasayishi xavfi yuzaga keladi. Hatto Mbappega ham «Real»da o‘z o‘yinini topib olish oson bo‘lmagandi. Isak esa markaziy hujumchi rolini talab darajasida uddalashi lozim. Turli jamoalar tarkibiga moslashib olish uchun anchayin qaltis vazifa. Gap-so‘zlar ko‘proq «Arsenal» xususida bo‘lsada, Isakni «Liverpul» tarkibida tasavvur qilish o‘rinli bo‘ladi. Agar Gakpo chap qanotda qolib, Dias va Nunyes yangi yilda boshqa jamoalarga o‘tib ketgan taqdirda, Slot yangi yetakchilarga muhtoj bo‘lib qoladi. Kolumbiyalik va urugvaylik futbolchilarga ko‘z tikkan xaridorlar yetarli.
Aleksander jamoaviy o‘yinchi va grand safida ochilishiga shubha yo‘q
Boshqa jamoalardagi aniq uzatmalar sohiblaridan farqli ravishda, Aleksanderdan bu borada ko‘proq ter to‘kish talab etiladi. Shvesiyalik hujumchi Xoland va Jeksonga nisbatan qariyb ikki baravar ko‘proq uzatmalarni amalga oshiradi. Zikr etilgan hujumchilar to‘p nazorati bo‘yicha APLda yetakchi bo‘lgan klublarda to‘p suradilar. «Nyukasl» esa bu borada 10-jamoa. Isak tez-tez pressing qo‘llashiga to‘g‘ri keladi. U to‘pni navbatma-navbat o‘ng oyog‘idan chap oyog‘iga oshirgan holda mohirlik bilan olib yuradi, gavdasi va uzun oyoqlaridan samarali foydalanadi.
Maydondagi yurish-turishi va muomalasidan Isak injiq tabiatli emas, hakamlar va futbolchilar bilan deyarli bahslashmaydi. Shuningdek, Shvesiya terma jamoasida Dyokeresh bilan juda ahil, doimo u bilan yonma-yon o‘ynashga, o‘zi 2-hujumchi rolini bajarib, sherigini qulay vaziyatga chiqarishga intiladi. Biroq ko‘pincha uning o‘zi beixtiyor bo‘m-bo‘sh darvoza qarshisida paydo bo‘ladi. Bu esa pozisiya tanlashdagi mahoratidan dalolat beradi. Har qanday hujumchi xatoliklardan xoli emas. Joriy mavsumda Isak 10ta imkoniyatdan foydalana olmadi. Lekin Xolandda, shuningdek, Salohda ham bu ko‘rsatkich 14ga teng. Demak, qahramonimiz ularga nisbatan intizomliroq.
Ha, «Nyukasl»ni tark etish vaqti keldi. Biroq Isak qishda ketishni istamayapti. Sababi, Fernando Torresdek tajribali hujumchining «Liverpul»dan «Chelsi»ga qishda o‘tishi omadsizlikka olib kelgandi. Xullas, Aleksander chempionlik kurashiga tayyor. Uning ajdodlari angliyalik emas, eritreyalik bo‘lganliklari bois, transfer qiymati rekord darajada bo‘lmasa kerak. «Hakkalar» savdoni 150 mln. funt-sterling bilan boshlamoqchilar. Biroq bu quruq maqtanishdan o‘zga narsa emas.
E’tiborli jihati shundaki, APLdagi 13ta golini Isak faqat o‘yindan urgan. Aleksander deyarli barcha zarbalarini yaqin masofadan amalga oshirgan. To‘pni raqib darvozasi oldida ko‘proq olib qo‘ygan hujumchi faqat «Bornmut»da bor. APLdagilar taktika bobidagi epchilligi uchun Gravenbex («Liverpul»), Kulushevski («Tottenxem») va Isak («Nyukasl»)ni tanlab olishdi va maqtashdi. Biz esa shvesiyalik futbolchiga salomatlik va omadli transferni tilaymiz.
S.RAHMONOV tayyorladi