Myonxengladbaxning “Borussiya” klubi hujum chizig‘ini yaponiyalik forvard bilan kuchaytirdi – klubga “Xolshtayn Kil” jamoasidan Syuto Matino ko‘chib o‘tdi. Hujumchining transferi haqida “Borussiya” matbuot xizmati klub saytida rasman ma’lum qildi.
Futbolchi nemis klubi bilan 4 yilga mo‘ljallangan mehnat shartnomasini imzoladi. Transfermarkt ma’lumotiga ko‘ra, Matino “Borussiya”ga 8 mln yevroga tushgan.
O‘tgan mavsumda 25 yoshli hujumchi “Xolshtayn Kil” safida 34 ta o‘yinda 12 ta gol va 3 ta golli uzatmaga mualliflik qila oldi. Shuningdek, Matino Yaponiya terma jamoasi futbolchisi bo‘lib, uning tarkibida 6 ta rasmiy o‘yin o‘tkazgan.