Gazetamizning avvalgi sonida «PSM Makassar» Indoneziya chempionati 16-turidan o‘rin olgan «Barito Puter»ga qarshi o‘yin oxirida 3:2 hisobini saqlab qolish ilinjidami, zaxiradan 12-futbolchini maydonga tushirgani, ammo bu ayyorligi keyinchalik fosh bo‘lgani haqida yozgan edik.
Bu holat Osiyo futboli obro‘siga katta minus, albatta. Lekin bunaqasi professionalligi bilan maqtanadigan yevrofutbolda ham kuzatilgan. Boz ustiga, Malta yoki Farer orollari chempionatida emas, Bundesligada. Yana uzoq o‘tmish emas, yaqindagina…
Tushunarliki, umumtushuncha bo‘yicha Indoneziya chempionati professional futbolning eng yaxshi namunasi emas. Lekin shunga o‘xshash voqea Yevropada birinchi qatorlarda zikr etiladigan Bundesligada, boz ustiga, nisbatan 2 yilcha oldin sodir bo‘lganiga nima deysiz? Odamning ishongisi ham kelmaydi – «Bavariya» voqea markazida! Ha, 2022 yilning aprel oyida Myunxen jamoasining Bundesligadan o‘rin olgan «Frayburg»ga qarshi o‘yinida katta «qovun» tushgandi. Tafsilotlarga to‘xtalsak, «Bavariya»ning o‘sha vaqtdagi bosh murabbiyi Yulian Nagelsmann 85-daqiqada Kingsli Koman va Korentin Tolisso o‘rniga zaxiradan Marsel Zabitser va Niklas Zyuleni maydonga tushiradi. Shu tariqa o‘yin davom etadi. Lekin oradan ko‘p o‘tmay, hakam Koman hamon maydonda ekanligini payqab qoladi. Fransiyalik futbolchi yuzaga kelgan janjal shovqini ostida darhol chetga chiqib ketadi. Lekin fakt shuki, «Bavariya» 16 soniya davomida maydonda 12 kishi bo‘lib qolgandi.
Bunday «qovun» sababi ham tezda aniqlanadi – «Bavariya» vakili adashib, zaxira hakamiga 29-raqamli futbolchi maydondan chiqib ketishi kerakligini bildirgan ekan. Ammo tarkibda bunday raqamli futbolchi yo‘q edi. Koman esa «11» ostida o‘ynayotgandi. Garchi bu adashmovchilik hech narsani o‘zgartirmagan bo‘lsada, kichik janjal kuzatiladi, baribir. To‘g‘ri, bu vaqtda 1:4 hisobida yutqazib turgan «Frayburg» uncha g‘azablanmaydi va texnik g‘alaba talab qilmaydi. Lekin Bundesligaga apellyasiya beradi, faqat xatoni «ko‘rsatib qo‘yish» uchun. Yakunda «Bavariya» jazolanmaydi – rasmiylar myunxenliklar g‘arazli niyat emas, balki e’tiborsizlik (jumladan, zaxira hakami beparvoligi qayd etiladi) oqibatida adashishganini ma’lum qilishadi.