O‘zbekiston sharqidagi Andijon shahar sudi 39 yoshli mahalliy fuqaroni Rossiya Qurolli kuchlari safida Ukrainadagi harbiy mojaroda qatnashgani uchun to‘rt yilu ikki oyga ozodlikdan mahrum qilish jazosiga hukm qildi. Buni RIA Novosti taqdim etgan sud qarorining nusxasi tasdiqlaydi. Sud hujjatlariga ko‘ra, andijonlik fuqaro 2023-yilning aprel oyida Rossiyaga ishlash uchun ketgan, biroq ko‘p o‘tmay Rossiya Qurolli kuchlarining maxsus harbiy operatsiyasiga (SVO) qo‘shilishga qaror qilgan. Shu yilning iyul oyida u Rossiya Mudofaa vazirligi bilan shartnoma tuzib, harbiy tayyorgarlikni tugatdi va Ukrainaga yuborildi. 2023-yil dekabr oyida u O‘zbekistonga qaytib keldi va mahalliy huquq-tartibot idoralarini SVOdagi ishtiroki haqida xabardor qildi. Sud qaror qabul qilishda uning pushaymonligi, aybiga iqrorligi, tergovda hamkorlik qilishi, sudlanganligi yo‘qligi, oilaviy ahvoli (uch nafar farzandi borligi)ni hisobga olgan. O‘zbekiston Jinoyat kodeksiga ko‘ra, qurolli to‘qnashuvda yollanma jangari sifatida qatnashish 5 yildan 10 yilgacha ozodlikdan mahrum qilish bilan jazolanadi. Noyabr oyida O‘zbekiston sudi mamlakat fuqarosini Rossiya armiyasi tarkibida Ukrainadagi jangovar harakatlarda qatnashgani uchun besh yilga ozodlikdan mahrum qilgan edi.
